По благословению Святейшего Патриарха Кирилла, в праздник святого равноапостольного князя Владимира надлежит ежегодно по окончании Литургии совершать в честь воспоминания Крещения Руси молебен по особому чину. (Служится 28-го июля после Божественной Литургии.)

ПОСЛЕ́ДОВАНИЕ МОЛЕ́БНОГО ПЕ́НИЯ

Диакон: Благослови́, влады́ко.

Иерей: Благослове́н Бог наш, всегда, ны́не и при́сно и во ве́ки веко́в.

Хор: Ами́нь.

Диакон: Сла́ва Тебе́, Бо́же наш, сла́ва Тебе́.

Хор: Царю́ Небе́сный, Уте́шителю, Ду́ше и́стины, И́же везде́ сый и вся́ исполня́яй, Со-кро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

БОГ ГОСПО́ДЬ, ГЛАС 8:

Диа́кон: Бог Госпо́дь, и яви́ся нам, благослове́н Гряды́й во И́мя Госпо́дне.

Стих 1: Испове́дайтеся Го́сподеви, я́ко благ, я́ко в век ми́лость Его́.

Хор: Бог Госпо́дь, и яви́ся нам, благослове́н Гряды́й во И́мя Госпо́дне.

(И далее на каждый стих)

Стих 2: Обыше́дше обыдо́ша мя, и И́менем Госпо́дним противля́хся им.

Стих 3: Не умру́, но жив бу́ду, и пове́м дела́ Госпо́дня.

Стих 4: Ка́мень, Его́же небрего́ша зи́ждущии, Сей бы́сть во главу́ у́гла, от Го́спода бысть Сей, и есть ди́вен во очесе́х на́ших.

ТРОПА́РЬ ЖИВОНАЧА́ЛЬНОЙ ТРО́ИЦЕ, ГЛАС 8:

Благослове́н еси́, Христе́ Бо́же наш,/ И́же прему́дры ловцы́ явле́й,/ ниспосла́в им Ду́ха Свята́го,/ и те́ми уловле́й вселе́нную,// Человеколю́бче сла́ва Тебе́.

ТРОПА́РЬ ВСЕМ СВЯТЫ́М В ЗЕМЛЕ́ РОССИ́ЙСТЕЙ ПРОСИЯ́ВШИМ, ГЛАС 8:

Я́коже плод кра́сный Твоего́ спаси́тельного се́яния,/ земля́ Ру́сская прино́сит Ти, Го́споди, вся святы́я, в той просия́вшия./ Тех моли́твами в ми́ре глубо́це// Це́рковь и страну́ на́шу Богоро́дицею соблюди́, Многоми́лостиве.

ТРОПА́РЬ КРЕЩЕ́НИЯ РУСИ́, ГЛАС 8:

Благослове́н еси́, Христе́ Бо́же наш,/ Зе́млю Ру́сскую Креще́нием просвети́вый,/ лю́дем ея́ низпосла́в Ду́ха Свята́го,/ и́хже и ко спасе́нию приведы́й,// Человеко-лю́бче, сла́ва Тебе́.

ТРОПА́РЬ РАВНОАПО́СТОЛЬНОГО КНЯ́ЗЯ ВЛАДИ́МИРА, ГЛАС 4:

Уподо́бился еси́ купцу́, и́щущему до́браго би́сера,/ славнодержа́вный Вла-ди́мире,/ на высоте́ стола́ седя́ ма́тере градо́в, богоспаса́емаго Ки́ева:/ испыту́я же и посыла́я к Ца́рскому гра́ду уве́дети правосла́вную ве́ру,/ обре́л еси́ безце́нный би́сер – Христа́,/ избра́вшаго тя, я́ко втора́го Па́вла,/ и оттря́сшаго слепоту́ во святе́й купе́ли,/ душе́вную, вку́пе и теле́сную./ Те́мже пра́зднуем твое́ успе́ние,/ лю́дие твои́ су́ще,// моли́ спасти́ся держа́вы твоея́ Росси́йския нача́льником и мно́жеству владо́мых.

ЗАПЕ́ВЫ:

Духовенство: Пресвята́я Тро́ице, Бо́же наш, сла́ва Тебе́.

Хор: Пресвята́я Тро́ице, Бо́же наш, сла́ва Тебе́.

Духовенство: Вси святи́и земли́ на́шея, моли́те Бо́га о нас.

Хор: Вси святи́и земли́ на́шея, моли́те Бо́га о нас.

Духовенство: Святы́й равноапо́стольный вели́кий кня́же Влади́мире, моли́ Бо́га о на́с.

Хор: Святы́й равноапо́стольный вели́кий кня́же Влади́мире, моли́ Бо́га о на́с.

ПРОКИ́МЕН И ЧТЕ́НИЕ ЕВА́НГЕЛИЯ:

Диа́кон: Вонмем. Премудрость вонмем, прокимен, глас четве́ртый:

Вознесо́х избра́ннаго от люде́й Мои́х.

Хор: Вознесо́х избра́ннаго от люде́й Мои́х.

Диа́кон: И́бо десни́ца Моя́ засту́пит его́ и мы́шца Моя́ укрепи́т его́.

Хор: Вознесо́х избра́ннаго от люде́й Мои́х.

Диа́кон: Вознесо́х избра́ннаго

Хор: От люде́й Мои́х.

Диа́кон: И о сподо́битися нам слы́шанию Свята́го Ева́нгелиа, Го́спода Бо́га мо́лим.

Хор: Го́споди, поми́луй. (Трижды)

Диа́кон: Прему́дрость, про́сти, услы́шим Свята́го Ева́нгелия.

Иере́й Мир всем.

Хор: И ду́хови твоему́.

Иере́й: От Матфе́я Свята́го Ева́нгелия чте́ние.

Хор: Сла́ва, Тебе́, Го́споди, сла́ва Тебе́.

Диа́кон: Во́нмем.

(Мф., зач. 55:)

Иере́й: Рече́ Госпо́дь при́тчу сию́: подо́бно есть Ца́рствие Небе́сное сокро́вищу *сокрове́ну [спрятанному] *на селе́ [в поле], *е́же [которое] *обре́т [найдя] челове́к *скры [утаил], и от ра́дости его́ и́дет, и вся, ели́ка и́мать, продае́т, и купу́ет *село́ [поле] то. *Па́ки [еще] подо́бно есть Ца́рствие Небе́сное челове́ку купцу́, и́щущу до́брых *би́серей [жемчужин], и́же обре́т еди́н многоце́нен би́сер, шед продаде́ вся, ели́ка имя́ше, и купи́ его́. *Па́ки [еще] подо́бно есть Ца́рствие Небе́сное не́воду вве́ржену в мо́ре и от вся́каго ро́да (рыб) собра́вшу, *и́же [который] *егда́ [когда] испо́лнися, извлеко́ша *и́ [его] на *край[берег], и се́дше избра́ша до́брыя (рыбы) в сосу́ды, а злы́я изверго́ша вон. Та́ко бу́дет в сконча́ние ве́ка: изы́дут А́нгели, и *отлуча́т [отделят] злы́я от среды́ пра́ведных, и вве́ргут их в пещь о́гненную, ту бу́дет пла́чь и скре́жет зубо́м. Глаго́ла им Иису́с: разуме́сте ли сия́ вся? Глаго́лаша Ему́: ей, Го́споди. Он же рече́ им: сего́ ра́ди вся́к кни́жник, научи́́вся Ца́рствию Небе́сному, подо́бен есть челове́ку *домови́ту, и́же изно́сит от сокро́вища своего́ но́вая и ве́тхая. И бысть, егда́ сконча́ Иису́с при́тчи сия́, пре́йде отту́ду. И прише́д во оте́чествие Свое́, уча́ше их на со́нмищи их.

Хор: Сла́ва, Тебе́, Го́споди, сла́ва Тебе́.

ЗАПЕ́ВЫ:

Духовенство: Пресвята́я Тро́ице, Бо́же наш, сла́ва Тебе́.

Хор: Пресвята́я Тро́ице, Бо́же наш, сла́ва Тебе́.

Духовенство: Вси святи́и земли́ на́шея, моли́те Бо́га о нас.

Хор: Вси святи́и земли́ на́шея, моли́те Бо́га о нас.

Духовенство: Святы́й равноапо́стольный вели́кий кня́же Влади́мире, моли́ Бо́га о на́с.

Хор: Святы́й равноапо́стольный вели́кий кня́же Влади́мире, моли́ Бо́га о на́с.

Хор: Досто́йно есть, я́ко вои́стинну, блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего, Честне́йшую херуви́м и Сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Диа́кон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Хор: Го́споди, поми́луй. (Трижды, на каждое прошение)

Еще́ мо́лимся о Вели́ком Господи́не и Отце́ на́шем Святе́йшем Патриа́рхе Кири́лле, и о Господи́не на́шем Высокопреосвяще́ннейшем митрополите (или: архиепи́скопе, или: преосвяще́ннейшем епи́скопе имярек), и всей во Христе́ бра́тии на́шей.

Благодаря́ще со стра́хом и тре́петом, я́ко раби́ непотре́бнии, Твоему́ благоутро́бию, Спа́се и Влады́ко наш, Го́споди, о Твои́х благодея́ниих, я́же излия́л еси́ на Зе́млю на́шу от Креще́ния ея́ и до ны́не, и припа́даем, и славосло́вие Тебе́, я́ко Бо́гу, прино́сим, и умиле́нно вопие́м: изба́ви от всех бед лю́ди Твоя́ и всегда́, я́ко Ми́лостив, испо́лни во благи́х проше́ния на́ша, приле́жно мо́лимся Тебе́, услы́ши и поми́луй.

Еще́ мо́лимся Тебе́, Спаси́телю на́шему, чрез благове́рнаго кня́зя Влади́мира благоволи́вшему избра́ти род наш в насле́дие Свое́ и в купе́ли Креще́ния дарова́ти Ду́ха Свята́го, о е́же Це́рковь на́шу Святу́ю от раско́лов и нестрое́ний соблюсти́, и в единомы́слии ве́ры ея́ утверди́ти, и ми́ром огради́ти, услы́ши и поми́луй.

Еще́ мо́лимся Тебе́, Го́споди Вседержи́телю, о е́же призре́ти и утверди́ти виногра́д сей, его́же насади́ и сохрани́ от всех наве́тов вра́жиих десни́ца Твоя́; и в пре́дняя ле́та да́руй насле́дию Твоему́ мир и безмяте́жие, да не ума́лится и не поколе́блется Русь Свята́я, ю́же избра́л еси́ в жили́ще Себе́, да сла́вится Трисвято́е И́мя Твое́, услы́ши и поми́луй.

Да́вый за́поведь Твою́ нам, е́же люби́ти Тебе́, Бо́га на́шего, и бли́жняго своего́, сотвори́, да не́нависти, вражды́, оби́ды и про́чая беззако́ния прекратя́тся, и́стинная же любо́вь да ца́рствует в сердца́х на́ших, мо́лим Ти ся, Спаси́телю наш, услы́ши и ми́лостивно поми́луй.

Иере́й: Услы́ши ны, Бо́же, Спаси́телю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны. Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Ами́нь.

Диакон: Го́споду помо́лимся.

Хор: Го́споди, поми́луй.

МОЛИ́ТВА:

Иере́й: Триипоста́сный Бо́же, О́тче Вседержи́телю, Сы́не Единоро́дный, Спаси́телю ми́ра, и Ду́ше Святы́й, просвеща́яй и освяща́яй племена́ и наро́ды! И́же и влады́ку Земли́ Ру́сския, кня́зя Влади́мира, к све́ту и́стинныя ве́ры наста́вивый, и тем всю страну́ на́шу Креще́нием просвети́вый, и со́нмом святы́х, я́ко пресве́тлым звезда́м, не́бо Це́ркве на́шея украси́вшим, возсия́ти дарова́вый! И нам, смире́нным и не-досто́йным ча́дом их, ны́не предстоя́щим сла́ве Твое́й и благода́рственное моле́бное пе́ние принося́щим за вся благодея́ния, бы́вшая на Руси́ от лет дре́вних и до ны́не. При́зри на ни́ву Твою́, Це́рковь Святу́ю, на страны́ и наро́ды, прее́мственно восприя́вшия ве́ру правосла́вную из еди́ной купе́ли Креще́ния в вода́х днепро́вских и ны́не принося́щих Тебе́, я́коже прекра́сный плод спаси́тельнаго се́яния Сло́ва Твоего́, ли́ки святы́х. Ти́и бо послужи́ша лю́дем свои́м ве́рою, наде́ждою и любо́вию, о́бразом сло́ва и жития́ указу́юще нам путь к соверше́нству по за́поведи Христо́вой: бу́дите у́бо соверше́ни, я́коже и Оте́ц ваш Небе́сный соверше́н есть. Сохраня́юще сие́ свято́е насле́дие их, мо́лимся Ти, Жизнода́вче: спаси́ и поми́луй нас, мир ми́ру Твоему́ да́руй и всему́ созда́нию Твоему́, его́же по грехо́м на́шим сы́ны ве́ка сего́ погуби́ти тща́тся. Ве́мы бо, я́ко не хо́щеши сме́рти гре́шников, но е́же обрати́тися и живы́м им бы́ти; при́зри на нас, во гресе́х пребыва́ющих, отврати́ гнев Твой, пра́ведно дви́жимый на ны, да́руй нам покая́ние и Твои́м неизрече́нным милосе́рдием поми́луй нас. Приими́ моли́твы и труды́ на́ша о умноже́нии любве́ среди́ всех люде́й ми́ра сего́. Зе́млю на́шу огради́, вла́сти умудри́, вся уте́ши и умири́, Це́рковь Твою́ возрасти́, достоя́ние Твое́ соблюди́, мужи́ и жены́, и младе́нцы благода́тию просвети́, и вся лю́ди Твоя́ в Правосла́вии и благоче́стии утверди́ моли́твами Пречи́стыя Твоея́ Ма́тере, си́лою Честна́го и Животворя́щаго Креста́ и всех святы́х, в Земли́ на́шей просия́вших, да в едине́нии ве́ры и любве́ сла́вим Тя, Отца́ и Сы́на и Свята́го Ду́ха, во ве́ки веко́в.

Хор: Ами́нь.

ВЕЛИЧА́НИЕ РАВНОАПО́СТОЛЬНОГО КНЯ́ЗЯ ВЛАДИ́МИРА:

Духовенство: Велича́ем тя,/ святы́й равноапо́стольный вели́кий кня́же Влади́мире,/ и чтим святу́ю па́мять твою́,/ и́долы попра́вшаго/ и всю зе́млю Ру́сскую// Святы́м Креще́нием просвети́вшаго.

Хор: Велича́ем тя,/ святы́й равноапо́стольный вели́кий кня́же Влади́мире,/ и чтим святу́ю па́мять твою́,/ и́долы попра́вшаго/ и всю зе́млю Ру́сскую// Святы́м Креще́нием просвети́вшаго.

Диакон: Прему́дрость.

Иере́й: Пресвята́я Богоро́дице, спаси нас.

Хор: Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Иере́й: Сла́ва Тебе́, Христе́ Бо́же, Упова́ние на́ше, сла́ва Тебе́.

Хор: Сла́ва, и ны́не. Го́споди, поми́луй. (Трижды) Благослови́.

ОТПУ́СТ:

Иере́й: Воскресы́й из ме́ртвых Христо́с, И́стинный Бог наш, моли́твами Пречи́стыя Своея́ Ма́тере…

ПО ОТПУСТЕ МНОГОЛЕТИЕ:

Диакон: Вели́кому господи́ну и отцу́ на́шему Кири́ллу, Святе́йшему Патриа́рху Моско́вскому и всея́ Руси́ и Свя́то-Тро́ицкия Се́ргиевы Ла́вры священноархимандри́ту, богохрани́мей стране́ на́шей, власте́м, во́инству и наро́дам ея́, всему́ освяще́нному собо́ру, благоче́стия ревни́телем и учи́телем, и всем во Правосла́вии Земли́ на́шея подвиза́ющимся сло́вом, писа́нием, уче́нием и богоуго́дным житие́м, и всем правосла́вным христиа́ном — мно́гая ле́та.

Хор: Мно́гая ле́та. (Трижды)